Monday, December 5, 2011

الرجالة كائنات تحرق الدم*
.
حقيقة علمية*

Friday, October 14, 2011

.
كل اللي بحبهم مش عارفة أوصل لهم أد ايه أنا بحبهم
أحيانا ببأى عصبية وكتير ما بعرفش أعبر
نفسي قبل ما أفقدهم أو يفقدوني أقدر أعرفهم هم ايه بالنسبة لي
.

Wednesday, April 13, 2011

نظرا لأني إنسانة لا تتقبل التغيير بسلاسة

فظروف عزالي من بيتي الحالي مخلياني مرتبكة ومضطربة

حسه إني هحس بافتقاد لحاجات كتير وإني مش هتعود على الحياة الجديدة بسهولة

مع العلم يعني إني ماكنتش ببأى في بيتي ده كتير نظرا لظروف الحمل والولادة وتوابعهما

بس أنا أصلا في حالة نفسية غير سوية

وبالتالي فأنا مش حمل أي أعباء نفسية إضافية

ابتديت أحس إني مرتبطة بحاجات أنا ماكنتش مرتبطة بيها أصلا

شباك الصالة اللي تقريبا ما بصتش منه ولا مرة من ساعة ما اتجوزت إلا في الأيام اللي فاتت نظرا لاكتئابي وحاجتي لشم الهوا.. بأيت حسه إنه حاجة مهمة وإني مش عايزة أسيبه

الزرع اللي تحت البيت اكتشفت إني ماكنتش مقدرة وجوده قبل كده


الدكتورة المؤدبة اللي بترد عليا في الصيدلية.. بفكر هسيبها لمين من بعدي؟!!

أنا اللي بقدر أي إنسان محترم ومؤدب في الزمن العجيب اللي إحنا عايشينه

فجأة حسه بارتباط عجيب بالسوبر ماركت اللي تحت بيتنا وامتنان للعمال اللي فيه

هو هو نفسه السوبر ماركت اللي كنت لسه بقول عليهم بيتأخروا عليا في إنهم يبعتولي الطلبات

ده غير بأه عدم مقدرتي على النوم إطلاقا بآلي يومين

من الآخر كم لغبطة مشاعرية نفسية أستحق التكريم على استحمالها

.

Tuesday, April 5, 2011

بآلي كتير جدا ماكتبتش هنا حاجة

ويمكن ماكانش في بالي إني أكتب هنا تاني خلاص

بس اللي عشته الأيام اللي فاتت وبعيشه حاليا حسه إني لازم أسجله

مش عارفة ليه

يمكن عشان لما أبأى أحسن أشوف الكلام ده وأفتكر الفترة الصعبة دي وأحمد ربنا

ويمكن عشان لما أرجع في قرار خدته دلوقتي ألاقي حاجة تفكرني بيه

.

الأيام اللي فاتت أنا تعبت أوي

تِعبت وتَعبت عمرو معايا جدا

وهو استحمل مني اللي مش ممكن حد غيره كان يستحمله

استحمل ومستعد يستحمل تاني

بس أنا قررت إني أبأى أحسن عشانه

عشان هو يستاهل حياة أحسن من اللي أنا كنت معيشاه فيها الفترة اللي فاتت

وعشان أنا كمان أستاهل أبأى مرتاحة ومبسوطة

وعشان أنا مش عايزاه في يوم من الأيام يحس إن راحته مابأتش معايا

أنا عايزة أفضل دايما راحته زي ما هو كل حاجة جميلة بالنسبة لي

ومش عايزة حاجة تفرق بيننا أبدا

.

هبدأ حياة جديدة بأسلوب جديد وبطريقة تفكير جديدة

وبإذن الله هقدر أبأى أحسن

.

Monday, August 17, 2009

أندلس جت (:
من ساعة ما عرفت إن آية ولدت وأنا نفسي أشوف بنتها
بجد جوايا مشاعر كتيييييير أوي ناحيتها مش عارفة إزاي ولا ليه ولا اشمعنى ولا أي حاجة
بس كل اللي عارفاه إني من ساعة ما عرفت إن أندلس جت وأنا بدعيلها إن ربنا يخليها لأبيها وأمها ويبارك لهم فيها ويجعلها بارة بيهم وقرة عين لهم
ربنا يبعد عنها كل سوء في الدنيا الصعبة دي ويجعل حياتها وحياة أهلها سهلة بيها ومعاها
حسة إنها هتبأى قريبة مني أوي
ومتخيلة نفسي بعد عشرين سنة لما تكون هي بأت شابة زي القمر وأنا عندي 45 سنة (: وبتقوللي يا طنط
أنا مش هخليها تقوللي يا طنط
عايزاها تبأى صاحبتي زي ما آية صاحبتي
كل حاجة حلوة أنا شوفتها من آية لازم أندلس تشوفها مني

أنا بحبك يا آية
وبحبك يا أندلس من قبل ما أشوفك
.

Saturday, May 9, 2009

داليا
وبعدين معاكي؟
بجد وبعدين؟؟
ليه مش عايزة تسيبيني في حالي بأه
كل مرة بحلم بيكي فيها ببأى فاكرة إن الحلم حقيقة وإننا اتصالحنا
إمبارح بجد كان الحلم حقيقي أوي
وسألتك إزاي أخلي مامتك تنسى اللي عملته ورديتي عليا
أنا مش عارفة دي إشارات حقيقية منك.. ولا دي كلها أضغاث أحلام؟
إنتي بجد واحشاني
ومش قادرة أوصف لك أد ايه ببأى سعيدة لما بنتصالح في الحلم
لكن كل مرة بتتأخري عليا في إنك تجيلي في حلم بقول خلاص
أخيرا مابأتش بحلم بيكي
ألاقيكي بعدها على طول جيالي وتحسسيني تاني بالذنب
أنا عارفة إن إحنا استحالة نرجع أصحاب
وإن اللي أنا عملته معاكي كان حاجة دنيئة
عارفة كل ده والله ومش ناقصني إنك تجيلي كل فترة تفكريني بيكي
.
أرجوكي كفاية
أخرجي بأه من حياتي
.

Monday, November 10, 2008

طول الطريق الصبح وأنا جاية الشغل مستمتعة جدااااا بجو الشتا اللي ابتدى يهل
حسيت إن هو ده الوقت المثالي بالنسبة لي من السنة
بحس إن ده وقتي
وبعدها افتكرت إن أنا عيد ميلادي بعد يومين
يعني كان أول احتكاك بيني وبين الدنيا كان زي دلوقتي
وحسيت إني فهمت أنا ليه جو الشتا أحلى عندي وأجمل من كل الفصول التانية
.

Saturday, November 1, 2008

اتعودت إني لما أقابل حد لازم أضحك في وشه
بأت حاجة بتحصل غصب عني ومن غير ما أحس حتى لو أنا في أشد الظروف سوءً
بس بجد حسة إن الموضوع ده بأه بيتعبني نفسيا وخصوصا في الكلية
الكلية دي أكبر مكان الواحد بينافق فيه
بتعامل مع ناس كتيييييييير أوي مش حباهم ومش عايزة أتعامل معاهم أصلا
وغصب عني ومن غير ما أحس بضحك في وشهم لما بشوفهم
بضحك عشان التعود.. وبالغصب
في ناس منهم ممكن فعلا من كتر كرهي ليهم إني أضحي بمبدأي وما أضحكش في وشهم بس لو كانوا ناس أعرفهم في حتة تانية غير الكلية
لكن للأسف
لازم غصب عني أتعامل معاهم وأتعامل كويس عشان ماحدش يحطني في دماغه وأبأى مقبولة عند الكل
.
.
ربنا يخرجني بجد من الدنيا كلها على خير
وفي أسرع وقت
.

Saturday, August 30, 2008

قبل ما أنام قلت دعاء النوم على غير العادة
باسمك ربي وضعت جنبي وبك أرفعه.. إن أمسكت نفسي فارحمها.. وإن أرسلتها فاحفظها.. بما تحفظ به عبادك الصالحين
.
لقيت نفسي بعيد تاني
إن أمسكتها فارحمها
وإن أرسلتها فاحفظها
.
إن أمسكتها فارحمها
!يعني أنا كل يوم روحي بتكون عند ربنا.. ويا ترجع يا ما ترجعش
طيب وهل ده يعني إن الناس اللي بيروحوا في النوم بصعوبة زي حالاتي.. ونومهم خفيف وبيصحوا من أقل حاجة زي حالاتي بردو.. هل ده معناه إن الناس دي متمسكة بالدنيا؟
وهل الناس اللي بيناموا بسهولة وبيصحوا بصعوبة مرتاحين أكتر هناك؟؟
.
.
بحاول أطرد الأسئلة دي من دماغي بس مش عارفة
.

Wednesday, August 20, 2008

كل ما أعدي من جنب أحمد وهو فاتح الفيس بوك أفتكر الدنيا
الدنيا زي الفيس بوك
صفحة الهوم بتاعته شكلها غير صفحتي خالص مع إنهم في نفس المكان وليهم نفس الوظيفة
بس باينة عند كل واحد مننا بشكل
والدنيا كده
كلنا عايشين نفس الحياة
بس كل واحد شايفها بشكل مختلف ومن زاوية مختلفة
.
وماحدش فينا يقدر يقول للتاني أنا اللي صح وانت غلط
.