أندلس جت (:
من ساعة ما عرفت إن آية ولدت وأنا نفسي أشوف بنتها
بجد جوايا مشاعر كتيييييير أوي ناحيتها مش عارفة إزاي ولا ليه ولا اشمعنى ولا أي حاجة
بس كل اللي عارفاه إني من ساعة ما عرفت إن أندلس جت وأنا بدعيلها إن ربنا يخليها لأبيها وأمها ويبارك لهم فيها ويجعلها بارة بيهم وقرة عين لهم
ربنا يبعد عنها كل سوء في الدنيا الصعبة دي ويجعل حياتها وحياة أهلها سهلة بيها ومعاها
حسة إنها هتبأى قريبة مني أوي
ومتخيلة نفسي بعد عشرين سنة لما تكون هي بأت شابة زي القمر وأنا عندي 45 سنة (: وبتقوللي يا طنط
أنا مش هخليها تقوللي يا طنط
عايزاها تبأى صاحبتي زي ما آية صاحبتي
كل حاجة حلوة أنا شوفتها من آية لازم أندلس تشوفها مني

أنا بحبك يا آية
وبحبك يا أندلس من قبل ما أشوفك
.

داليا
وبعدين معاكي؟
بجد وبعدين؟؟
ليه مش عايزة تسيبيني في حالي بأه
كل مرة بحلم بيكي فيها ببأى فاكرة إن الحلم حقيقة وإننا اتصالحنا
إمبارح بجد كان الحلم حقيقي أوي
وسألتك إزاي أخلي مامتك تنسى اللي عملته ورديتي عليا
أنا مش عارفة دي إشارات حقيقية منك.. ولا دي كلها أضغاث أحلام؟
إنتي بجد واحشاني
ومش قادرة أوصف لك أد ايه ببأى سعيدة لما بنتصالح في الحلم
لكن كل مرة بتتأخري عليا في إنك تجيلي في حلم بقول خلاص
أخيرا مابأتش بحلم بيكي
ألاقيكي بعدها على طول جيالي وتحسسيني تاني بالذنب
أنا عارفة إن إحنا استحالة نرجع أصحاب
وإن اللي أنا عملته معاكي كان حاجة دنيئة
عارفة كل ده والله ومش ناقصني إنك تجيلي كل فترة تفكريني بيكي
.
أرجوكي كفاية
أخرجي بأه من حياتي
.

طول الطريق الصبح وأنا جاية الشغل مستمتعة جدااااا بجو الشتا اللي ابتدى يهل

حسيت إن هو ده الوقت المثالي بالنسبة لي من السنة

بحس إن ده وقتي

وبعدها افتكرت إن أنا عيد ميلادي بعد يومين

يعني كان أول احتكاك بيني وبين الدنيا كان زي دلوقتي

وحسيت إني فهمت أنا ليه جو الشتا أحلى عندي وأجمل من كل الفصول التانية

.

اتعودت إني لما أقابل حد لازم أضحك في وشه

بأت حاجة بتحصل غصب عني ومن غير ما أحس حتى لو أنا في أشد الظروف سوءً

بس بجد حسة إن الموضوع ده بأه بيتعبني نفسيا وخصوصا في الكلية

الكلية دي أكبر مكان الواحد بينافق فيه

بتعامل مع ناس كتيييييييير أوي مش حباهم ومش عايزة أتعامل معاهم أصلا

وغصب عني ومن غير ما أحس بضحك في وشهم لما بشوفهم

بضحك عشان التعود.. وبالغصب

في ناس منهم ممكن فعلا من كتر كرهي ليهم إني أضحي بمبدأي وما أضحكش في وشهم بس لو كانوا ناس أعرفهم في حتة تانية غير الكلية

لكن للأسف

لازم غصب عني أتعامل معاهم وأتعامل كويس عشان ماحدش يحطني في دماغه وأبأى مقبولة عند الكل

.

.

ربنا يخرجني بجد من الدنيا كلها على خير

وفي أسرع وقت

.

قبل ما أنام قلت دعاء النوم على غير العادة

باسمك ربي وضعت جنبي وبك أرفعه.. إن أمسكت نفسي فارحمها.. وإن أرسلتها فاحفظها.. بما تحفظ به عبادك الصالحين

.

لقيت نفسي بعيد تاني

إن أمسكتها فارحمها

وإن أرسلتها فاحفظها

.

إن أمسكتها فارحمها

!يعني أنا كل يوم روحي بتكون عند ربنا.. ويا ترجع يا ما ترجعش

طيب وهل ده يعني إن الناس اللي بيروحوا في النوم بصعوبة زي حالاتي.. ونومهم خفيف وبيصحوا من أقل حاجة زي حالاتي بردو.. هل ده معناه إن الناس دي متمسكة بالدنيا؟

وهل الناس اللي بيناموا بسهولة وبيصحوا بصعوبة مرتاحين أكتر هناك؟؟

.

.

بحاول أطرد الأسئلة دي من دماغي بس مش عارفة

.

كل ما أعدي من جنب أحمد وهو فاتح الفيس بوك أفتكر الدنيا

الدنيا زي الفيس بوك

صفحة الهوم بتاعته شكلها غير صفحتي خالص مع إنهم في نفس المكان وليهم نفس الوظيفة

بس باينة عند كل واحد مننا بشكل

والدنيا كده

كلنا عايشين نفس الحياة

بس كل واحد شايفها بشكل مختلف ومن زاوية مختلفة

.

وماحدش فينا يقدر يقول للتاني أنا اللي صح وانت غلط

.

هل معنى إني أخدت حقي يبأى مفيش ناس تانية بتتظلم؟؟

وللا المفروض إن كل واحد يحكم على تجربته هو واللي عايشه لأن كل واحد ليه ظروفه؟

يعني لما أحس إني خدت حقي في بلدي.. هل مفروض عليا إني أقول إن البلد حلوة؟

مع إني شايفة ناس تانية مظلومة وبتتظلم أوي؟؟

لو جيت أدافع عن حاجات كتير في البلد أنا حسة إني خدت حقي منها بطريقة كويسة في ناس كتيرة تقول لي إنتي اللي استثناء

وأبسط وأكبر مثال موضوع التعليم

لما روحت حضرت مرة حفلة في الجامعة الأمريكية وكانوا بيتتريأوا فيها على التعليم الحكومي كان هاين عليا أقوم أموتهم كلهم

وفكرت جديا في إنهم لو سمحوا لأشخاص من الحضور بالتعليق على أي حاجة إني لازم هتكلم وأقول رأيي بس للأسف ماجتش فرصة

كنت عايزة أقوم وأقوللهم أنا خريجة مدارس وجامعات حكومية.. وأفتخر

أنا شايفة إني اتعلمت تعليم كويس جدا مع إنه حكومي وأنا راضية عنه مش هقول تماما بس ممكن بنسبة 90% راضية

ولما جيت أقول لحد على الموضوع ده وأحكي عن الموقف معظم الناس قالوا لي إن إنتي الاستثناء لكن القاعدة إن الناس بتتخرج بعد التعليم الحكومي مش على المستوى المطلوب

طيب يا ترى العيب فين؟؟

في التعليم؟

طيب ما التعليم بيخرج ناس كويسة

في الناس؟

معقولة كل الناس دول معيوبين؟

وللا فعلا الاستثناءات هم بس اللي بيفلتوا؟؟

طيب ما أنا بردو أعرف ناس كتير ما شاء الله مخهم كويس جدامش معقولة دول كلهم استثناءات؟؟

في الآخر أنا مش عارفة أحكم على التجربة التعليمية الحكومية فعلا

ومش عارفة أحكم على البلد في الفترة الحالية

لأن أنا ما اتظلمتش

بس غيري اتظلم

.

هدى.. إيناس.. مريم

نزولكم من بيتكم إمبارح عشان تكونوا معايا في الكلية وأنا بمضي بجد حاجة مش هنساهالكم أبدا

.

وجودكم معايا إمبارح ومباركاتكم أثرها عليا كان حلو أوي

والفرحة اللي كانت في صوت دكتور إخلاص إمبارح لما كلمتها قلتلها بآلي كتير ماسمعتهاش

.

شكرا ليكم كلكم بجد

.

.

لك الحمد يا رب حتى ترضى

قوس قزح

وبوبا

طلبوا مني أجاوب تاج

التاج عايزني أتكلم عن عشر حاجات عني

.

هتكلم عن عشر حاجات عشوائية.. اللي هييجي في بالي يعني

.

أولا

أنا عندي مشكلة مأرقاني

أنا بحب بابا وماما أوي.. أوي يعني

لكن للأسف مش بعرف أعبرلهم عن الحب ده

يعني الحمد لله بحاول على أد ما أقدر إنهم يبأوا راضيين عني.. بس ده مش كفاية

ودايما في بالي جملة إنك لما تحب حد عرفه إنهاردة إنك بتحبه عشان ماتضمنش مين يعيش لبكرة

وبجد المعنى ده مأزمني.. بس والله مش عارفة أعمل إيه

نفسي يحسوا بأد إيه أنا بحبهم مش بس يحسوا إني بحبهم.. لا أنا عايزاهم يعرفوا المقدار

.

وأولا تؤدي بنا لثانيا

أنا مش متخيلة إني في يوم من الأيام ممكن أفقد ماما أوبابا.. أوعمرو

التلاتة دول لو بعد الشر حصل لحد فيهم حاجة أنا أكاد أجزم إني استحالة هعيش بعدهم

.

ثانيا تؤدي بنا لثالثا

كتير بفكر.. إني زي ما بحب الناس دي ومش عايزة أفقدهم.. هم كمان بيحبوني

طيب

لو أنا مت قبلهم.. هم هيزعلوا أوي عليا -بيتهيألي يعني

ولو حد فيهم بعد الشر مات قبلي.. أنا اللي هتعب أوي.. أوي

وبجد بفكر في حاجة مجنونة جدا

إني عشان بحبهم جدا.. جدا أنا ممكن أستحمل التعب ده لوحدي لكن ما أخليهمش هم يعيشوه

وبقعد أفكر في الجملة اللي الناس بتقولها.. ربنا يجعل يومي قبل يومك والكلام ده وبحس إنهم بيتمنوا لنفسهم الخير عشان يسيبوا للي وراهم التعب

.

ثالثا تؤدي بنا لرابعا

مأزمني جدا جدا جدااااا إني مش هعرف مين اللي زعل عليا بعد ما أموت.. وزعل عليا أد إيه

ومأزمني أكتر إن الحياة في الدنيا هتستمر بعدي

يعني إيه تستمر بعدي؟ وليه؟؟

يعني إيه أكون أنا ميتة وناس تانيين عايشين؟؟

.

خامسا

(: أنا حسة إني زودت أوي كده في حوارات الموت

.

سادسا

أنا نفسي جدا أسافر بلاد كتير وأتفرج على الدنيا كلها قبل ما أموت

((: لا حول ولا قوة إلا بالله بردو جبت سيرة الموت مش فاهمة في ايه

.

سابعا

كل حد علمني حاجة في حياتي ابتداء من المدرسين ومرورا بالدكاترة وانتهاء بريهام اللي علمتني السواقة (: أنا مقدراهم جدا

.

ثامنا

أنا مابحبش العتاب.. ومش سهل إني أزعل من حد.. بس لما بزعل بخرج الشخصية اللي زعلت منها من حياتي للأبد

لأن أنا أكره ما عليا بجد إني أتعامل مع حد أنا مش عايزة أتعامل معاه

.

تاسعا

أنا خايفة من المستقبل أوي.. وفي نفس الوقت واثقة في ربنا أوي
مش عارفة إزاي الاتنين في نفس الوقت

.

عاشرا

أنا نفسي أبأى أحسن من كده

.

وأنا قاعدة مستنية ماما في العربية قلت أفتح الراديو أتسلى

لقيت برنامج الأخ الخنيق أسامة منير

وواحدة بتقول له

أنا بحب خطيبي أوي

بس المشكلة إنه بعيد عني

بيشتغل في بلد تانية

قال لها: اصبري

.

بس اللي مش فاهمه الأستاذ الأخ أسامة إن حاليا في شرخ

والصبر اللي فوق الاحتمال قد يفلق الجدار تماما

.